O fferm ar Fynyddoedd Hiraethog uwchben Dyffryn Conwy mae dau frawd, Gwyn ac Elwy Williams, yn prysur ddyfeisio defnydd newydd ar gyfer y cig oen o’u praidd o 800 o ddefaid Suffolk a Texel. Maent yn masnachu fel Arlwyo Nant Catering ac mae eu byrgyrs cig oen a’u stêcs cig oen bellach yn gwerthu’n gyflym o’u trelar arlwyo newydd mewn digwyddiadau a sioeau o’r Amwythig i Bwllheli.

Mae’r brodyr a’u rhieni, Pendri a Gwyneth, wedi bod yn ffermio cig oen a chig eidion o Tŷ Nant Isaf a Phandy Tudur am 45 o flynyddoedd ond roeddynt yn bryderus am hyfywedd tymor hir y fferm.. 

“Oherwydd bod prisiau marchnad yn gostwng, rydym wedi bod yn chwilio am ffyrdd eraill i ychwanegu gwerth at ein cig oen a hybu incwm y fferm,” meddai Gwyn. Gydag anogaeth gan ffermwyr ifanc eraill sy’n rhan o’r grŵp Agrisgôp lleol, sy’n cael ei arwain gan Menter a Busnes, fe’i argyhoeddwyd i amrywio eu cynnyrch. “Rydym wedi bod yn pendroni am gael ein trelar arlwyo symudol ein hunain am flynyddoedd” meddai Elwy, “a'r peth gorau am werthu cynnyrch o’ch cig oen eich hun yw eich bod yn cael adenillion uniongyrchol ar eich buddsoddiad.” Mae Gwyn ac Elwy wedi datblygu eu ryseitiau eu hunain ar gyfer Byrgyrs Traddodiadol mintys a tshili sy’n cael eu cynhyrchu 12 milltir i ffwrdd yn Ninbych, lle mae’r ŵyn yn cael eu lladd a’u prosesu. “Rydym yn awyddus iawn i wneud yn siŵr bod ein cynnyrch mor gywrain ag sy’n bosib,” meddai Gwyn, “felly nid ydym yn caniatáu unrhyw gadwolion, dim ond cynhwysion naturiol, ac rydym yn cadw’n ryseitiau’n weddol syml. Yn wahanol i gynhyrchwyr byrgyrs eraill, dim ond cig gorau’r cig oen fyddwn ni’n ei ddefnyddio.”