wedi pendroni drosto am flynyddoedd lawer ar ôl sylweddoli y gallai’r DU wella’r bwyd mae’n ei gynhyrchu. “Bryd hynny, sylweddolom y gallem arwain chwyldro’r pwdin Prydeinig gwych,” meddai Mark.

Gan fanteisio ar gefndir teuluol yn y busnes bwyd, oedd yn cynnwys gwesty gwely a brecwast y teulu, ei dad yn gigydd a’i chwaer yn gogydd proffesiynol, cafodd Steve fan gwag mewn becws lleol oedd yn gysylltiedig â’i deulu. Gyda Tracey’n gweithio fel y prif ddyluniwr pwdinau, a Juliet fel Ysgrifennydd y Cwmni, lansiodd Steve a Mark eu busnes gydag amrywiaeth o Bwdinau Nadolig yn Ffair Nadolig y Sioe Frenhinol ym mis Tachwedd 2007. “Gweithiom gyda chwmni dylunio graffeg lleol i gael brand sy’n ymddangos yn gyfoes, ac ar yr un pryd yn cyfleu gwerthoedd mwy traddodiadol y pwdinau blasus sy’n defnyddio’r cynhwysion gorau a mwyaf ffres,” esboniodd Mark. “Rydym yn credu bod y cynnyrch terfynol yn cyflawni hynny.”

Ers hynny, mae’r amrywiaeth wedi ymestyn i gynnwys dau wahanol faint o bwdinau siocled Belgaidd, pwdin sitrws, pwdin sinsir, pwdin toffi, a phwdin oren Seville, ac mae pob un mewn carton papur bioddiraddadwy neu bowlenni ceramig. Wrth ddisgrifio eu cynhyrchion, esboniodd Mark “Mae ein pwdinau’n rhai ysgafn, yn wlyb ac yn fras.” Mae Tracey bob amser yn ceisio defnyddio cynhwysion lleol ac organig yn bennaf, lle bo hynny’n bosibl, ac mae hi’n gweithio’n galed i greu mwy o bwdinau i’w hychwanegu at y rhestr ac mae hi hefyd yn datblygu amrywiaeth o sawsiau a chwstard ar hyn o bryd.

Roedd gan lawer o bobl ddiddordeb mawr yn eu stondin yn y sioe Cegaid Canolbarth Cymru a’r Real Food Festival yn Earls Court. “Mae rhai cogyddion enwog wedi dangos diddordeb,” meddai Mark. “Daeth Anthony Worrall Thompson i ymweld â ni yn y ddau ddigwyddiad, a daeth Angela Hartnett, oedd yn gweithio i Gordon Ramsey cynt, draw am sgwrs.” Mae The Pudding Compartment hefyd wedi cael ymholiadau gan siopau ledled y DU, ac maent eisoes yn ystyried gwerthu tramor. Ymddengys na fydd llawer yn llesteirio uchelgeisiau byd-eang y cwmni newydd hwn.